གཞིས་བྱེས་བོད་མིའི་སྐྱིད་སྡུག་མཉམ་མྱོང་གི་གཟེངས་རྟགས་ཐེངས་དང་པོ་ཕུལ་ཡོད་པ།

༢༠༡༧ ལོའི་ཟླ་༧ ཚེས་༢༩་ཉིན་བོད་ཀྱི་མི་རབས་གསར་བའི་མཐུན་ཚོགས་བཙུགས་ནས་ལོ་ལྔ་འཁོར་བའི་དུས་དྲན་དང་སྟབས་བསྟུན། བོད་དོན་འཐབ་རྩོད་ཁྲོད་ཆོལ་གསུམ་རྡོག་རྩ་གཅིག་སྒྲིལ་ཇི་ལྟར་གནང་དགོས་མིན་སྐོར་བགྲོ་གླེང་དང་། དམིགས་བསལ་ལོ་མང་རིང་སུད་སི་ཇི་ནི་ཝ་མཉམ་འབྲེལ་རྒྱལ་ཚོགས་གཙོས་པའི་རྒྱལ་སྤྱིའི་ཚོགས་སྡེ་ཁག་ལ་བོད་དོན་ཞུ་གཏུག་གི་ལས་འགུལ་སྤེལ་མཁན་ཁྱིམ་ཚང་བདུན་ལ་བསྔགས་བརྗོད་གཟེངས་རྟགས་བཅས་ཕུལ་ཡོད་འདུག

གོང་ཚེས་ཉིན་སུད་སི་ས་གནས་ཝེ་རྡན་སི་ཝེལ་ནང་བོད་ཀྱི་མི་རབས་གསར་པའི་མཐུན་ཚོགས་ཚུགས་ནས་ལོ་ལྔ་འཁོར་པའི་དུས་དྲན་མཛད་སྒོ་ཞིག་འཚོགས་ཡོད་པ་དང་།མཛད་སྒོ་འདིའི་ཐོག་མར་ཆོལ་གསུལ་མཐུན་ལམ་རྡོག་རྩ་གཅིག་སྒྲིལ་ཇི་ལྟར་གནང་དགོས་སྐོར་དང་། བོད་མིའི་རྡོག་རྩ་གཅིག་སྒྲིལ་གྱི་གལ་གནད་རང་བཞིན་སྐོར་བགྲོ་གླེང་གནང་བར། ཡུ་རོབ་སྤྱི་འཐུས་ཟམ་མདོ་བྱམས་པ་ལགས་དང་། སུད་སི་དང་ལེག་ཏེན་སིཊ་ཡན་བོད་རིགས་མི་མང་ཚོགས་གཙོ་བསྟན་འཛིན་སྙིང་པོ་ལགས། སུད་སི་ཇི་ནེ་ཝ་མཉམ་འབྲེལ་རྒྱལ་ཚོགས་མདུན་དུ་བོད་དོན་ཞུ་གཏུག་གི་གཙོ་འགན་བཞེས་མཁན་སྟག་ཚང་དཀོན་ཅོག་ལགས་བཅས་མཉམ་ཞུགས་གནང་སྟེ་བགྲོ་གླེང་གནང་ཡོད་པ་རེད་འདུག གཞན་དྲ་ཐོག་ནས་ཧྥི་རན་སིར་གནས་བཞུགས་ཐུབ་བསྟན་རྒྱ་མཚོ་དང་། དབྱིན་ཡུལ་ནང་གནས་བཞུགས་དབྱིག་གཉེན་ལགས་གཉིས་དྲ་ཐོག་ནས་མཉམ་ཞུགས་གནང་ཡོད་ཀྱང་། དྲ་ལམ་སྐྱོ་བའི་དབང་གིས་བགྲོ་གླེང་གི་ཆ་ཤས་ལེན་ཐུབ་ཡོད་མི་འདུག

བོད་ཀྱི་མི་རབས་གསར་བའི་མཐུན་ཚོགས་ཀྱི་དུས་དྲན་ཐེངས་ལྔ་བའི་མཛད་སྒོ་འདིའི་ཐོག་དམིགས་བསལ་ལས་རིམ་གཞན་ཞིག་ཡོད་པ་ནི། བོད་མིའི་སྐྱིད་སྡུག་མཉམ་མྱོང་གི་ལས་འགུལ་ལམ། རྒྱལ་ཚོགས་སུ་བོད་དོན་ཞུ་གཏུག་གནང་མཁན་ནང་མི་བདུན་ལ་བོད་ཀྱི་མི་རབས་གསར་བའི་མཐུན་ཚོགས་ཀྱི་་དང་། བོད་མིའི་སྐྱིད་སྡུག་མཉམ་མྱོང་གི་ལས་འགུལ་ལམ་ཁྱིམ་ཚང་བདུན་གྱི་རྒྱལ་ཚོགས་སུ་བོད་དོན་ཞུ་གཏུག་ལས་འགུལ་བ་རྣམས་ལ་ཐེངས་འདིའི་གཟེངས་རྟགས་འདི་འབུལ་དགོད་པའི་དམིགས་ཡུལ་ནི། ༢༠༡༡ ལོ་ནས་མུ་མཐུད་རྒྱལ་ཚོགས་གཙོས་རྒྱལ་སྤྱིའི་ཚོགས་སྡེ་ཁག་ལ་བོད་དོན་ཞུ་འབོད་དང་། རྒྱལ་སྤྱིའི་མི་མང་ལ་བོད་དོན་འགྲེལ་བརྗོད་ཀྱི་ལས་འགུལ་འདྲ་མིན་ཟླ་རེར་ཐེངས་རེར་རྒྱུན་མ་ཆད་པར་སྤེལ་བའི་སྙིང་སྟོབས་ལ་བསྔགས་བརྗོད་དང་། འདི་བཞིན་བོད་པའི་སྤྱི་ཚོགས་ནང་ལོ་ནས་ལོ་དང་། ཟླ་ནས་ཟླ་ལ་མི་རྒྱུ་གཉིས་ཀྱི་དཀའ་ཚག་ཚད་མེད་བརྒྱུད་དང་བླངས་ཐོག་ལས་འགུལ་རྒྱུན་མ་ཆད་པར་སྤེལ་མཁན་ཧ་ཅང་ཉུང་བ་ལས་ཀྱང་ཉུང་བ་མ་གཏོགས་མེད་པའི་གནས་སྐབས་འདིར། གོང་འཁོད་ལས་འགུལ་བ་ཁོངས་རྣམས་ཀྱི་རྒྱུན་སྐྱོང་གི་སྙིང་སྟོབས་དང་། བོད་ཀྱི་བདེན་དོན་འཐབ་རྩོད་ལ་བཞག་པའི་ལྷག་བསམ་དང་སེམས་ཤུགས་བཅས་ནི་བོད་ཀྱི་སྤྱི་ཚོགས་ནང་ཅིས་ཀྱང་ངོས་འཛིན་གནང་ཐུབ་དགོས་པ་ཞིག་ཡིན་པ་དམིགས་ཡུལ་དུ་བཟུང་སྟེ་ཕུལ་བ་ཡིན་འདུག (more…)

Share Button

Share Button

ཛུ་རིག་ནང་བོད་དོན་སྐད་འབོད་ལས་འགུལ་སྤེལ།

ཕྱི་ཚེས་༢༨ ཉིན་སུད་སི་དང་ལིག་ཏེན་སི་ཊཡན་བོད་རིགས་མི་མང་དང་བོད་ཀྱི་མི་རབས་གསར་པའི་མཐུན་ཚོགས་གཉིས་ཀྱི་གོ་སྒྲིག་འོག སུད་སི་གྲོང་ཁྱེར་ཛུ་རིག་ནང་རྒྱ་གཞུང་ལ་ངོ་རྒོལ་སྐད་འབོད་ལས་འགུལ་ཞིག་གོ་སྒྲིག་གནང་ཡོད་འདུག

གོང་ཚེས་ཉིན་སུད་སི་དང་ལིག་ཏེན་སི་ཊ་ཡན་བོད་རིགས་མི་མང་གི་སྒྲིག་འཛུགས་དང་བོད་ཀྱི་མི་རབས་གསར་པའི་མཐུན་ཚོགས་གཉིས་ཀྱི་གོ་སྒྲིག་འོག ༢༠༡༧ ཟླ་༤ ཚེས་༡༥ ཉིན་བོད་ཁམས་དཀར་མཛེས་རྫོང་ཐོག་ཏུ་རྒྱལ་གཅེས་དཔའ་བོ་དབང་ཕྱུག་ཚེ་བརྟན་ལགས་ཀྱིས་རྒྱ་གཞུང་གིས་མུ་མཐུད་བོད་ཐོག་དམ་དྲག་གི་སྲིད་བྱུས་སྤེལ་བཞིན་པར་ངོ་རྒོལ་ཆེད་རང་ལུས་མེར་སྲེག་གནང་ཡོད་པའི་གནས་ཚུལ་བྱུང་གསལ་ལྟར། ས་གནས་ཛུག་རིག་གི་ས་གནས་Werdmuhleplatz ནས་རྒྱ་ནག་གཞུང་ཚབ་མདུན་བར་རྒྱ་གཞུང་གི་གདུག་རྩུབ་སྲིད་བྱུས་ལ་ངོ་རྒོལ་དང་། གོང་འཁོད་རྒྱལ་གཅེས་དཔའ་བོ་ཁོང་ལ་གདུང་སེམས་མཉམ་སྐྱེད་ཆེད་སྐད་འབོད་ལས་འགུལ་ཞིག་གོ་སྒྲིག་གནང་ཡོད་འདུག

ལས་འགུལ་འདི་ཕྱི་དྲོའི་ཆུ་ཚོད་༡༨ ཐོག་དབུ་འཛུགས་ཀྱིས་ཁྲོམ་གཞུང་དུ་སྐད་འབོད་བྱས་ཡོད་པ་དང་། ལས་འགུལ་བ་རྣམས་རྒྱ་ནག་གཞུང་ཚབ་མདུན་ཐང་དུ་འདུ་འཛོམས་ཏེ་སྐད་འབོད་དང་། བོད་དོན་གཏམ་བཤད་སོགས་གནང་ཡོད་འདུག གཏམ་བཤད་གནང་མཁན་སུད་སི་དང་ལིག་ཏེན་སི་ཊཡན་བོད་རིགས་མི་མང་ཚོགས་གཙོ་མཆོག་དང་། བོད་ཀྱི་མི་རབས་གསར་པའི་མཐུན་ཚོགས་ཀྱི་ཚོགས་གཙོ། ས་གནས་བུད་མེད་ཚོགས་པའི་ཚོགས་གཙོ། སུད་བོད་མཐུན་གྲོགས་ཚོགས་པའི་སྐུ་ཚབ། ཡུ་རོབ་བོད་རིགས་གཞོན་ནུའི་མཐུན་ཚོགས་ཀྱི་ཚོགས་གཙོ་བཅས་ཀྱིས་ལས་འགུལ་འབྲེལ་བའི་བོད་དོན་གཏམ་བཤད་སོགས་གནང་ཡོད་འདུག

གསར་འགོད་པ། ཙ་ཡུས་ཕུན་ཚོགས།

Share Button
ནང་དོན་ཡོད་ཚད་ཀྱི་པར་དབང་བོད་ཀྱི་མི་རབས་གསར་པའི་མཐུན་ཚོགས་ལ་ཡོད།